Campusak ikasleen, enpresen, ikastetxearen eta ekintzaileen arteko topaguneak sortzen ditu

Campus Zulaibar berriaren helburuetako bat Arratiako bailaran ekintzailetza sustatzea da, eta horretarako beharrezkoa da enpresak, ikasleak, ekintzaileak eta ikastetxea harremanetan jartzea. Bailarako sarea sendotuko duten sinergiak sortzea eta enpresa eta enplegu aukera berriak sortzea, baita Zulaibarko ikasleentzat ere.

Asmoa urtean enpresa bat sortzea da, eta eskualdeari eta eskualdearen dinamismoari funtsezko ekarpen bat egitea. «Helburua da enpresek Campus Zulaibar beraien buruaren hedapen bezala ikustea eta inguruko ekintzaileak hurbiltzea», azaldu du elkarrizketa batean Gorka Goikoetxeak, Zulaibar Lanbide Ikastegiko enpresekiko harremanaren arduradunak.

Ekipamendu espezifikoa

Ekintzailetza ekosistema honi laguntzeko, Campusak ekipamendu espezifikoa du, hala nola koworking gela bat, ekintzailetza nahi dutenek erabil dezaketena. Baita bilera gelak eta ekipamendu teknologikoa ere. Era berean, Errota Fundazioaren laguntza ere eska dezakete. Arratia bultzatzeko erakundeak Campus Zulaibarren du egoitza.