Zulaibar Arratiako Lanbide Ikastegiko Oinarrizko Mailako Lanbide Heziketako ikasle batzuek, zehazki 16 urte ez izateagatik ikastetxean geratu behar izan direnak, elkarlan proiektu berezi batean parte hartu dute: Gorbeiako Parke Naturalean abereentzako ate baten fabrikazioa eta instalazioa.

Proiektu hau Bizkaiko Foru Aldundiarekin, Areatzako Udalarekin eta Upekolupetza abeltzaintza-elkartearekin lankidetzan eraman da aurrera, ingurunea zaintzeko eta tokiko jarduera abeltzainari babesa emateko konpromisoaren baitan.

Ikasleek, irakasleekin batera, prozesu osoaren ardura izan dute: egiturarako materialak moztu, soldatu, margotu, bisagrak eta pasadoreak fabrikatu dituzte. Zurgintzako lanak ere egin dituzte: egurra moztu, bernizatu eta egitura metalikoari torlojuz lotu. Behin atea amaituta, adostutako tokira eraman dute muntaia egiteko, eta bertan, gainera, mantentze-lanak egin zituzten galtzadan, harriak eta legarra erabiliz, abeltzainen eta abereen igarotzea errazteko.

Esperientzia honek batzen ditu ikaskuntza, talde-lana, ingurumenarekiko eta gizartearekiko konpromisoa. Eskerrik asko parte hartu duten eragile guztiei!