Zulaibarren, ikaskuntza industria-inguruneko benetako egoeretara hurbiltzen jarraitzen dugu. Mekanizazioko Erdi Mailako 2. mailako ikasleek berriki aurkeztu dute beren bigarren prestakuntza-erronkari dagokion proiektua.

Oraingoan, zilindro pneumatiko bat mekanizatu eta muntatu dute, sektoreko enpresa batean egingo litzatekeen materialen hautaketa-prozesua simulatuz. Dinamika horren bidez, mekanizazioaren alderdi teknikoak ez ezik, funtzionaltasuna, erresistentzia eta industria-erabilerarekiko egokitzapen-irizpideei lotutako erabakiak ere hartu ahal izan dituzte ikasleek.

Proiektua osatzeko, zilindroak funtzionatzeko behar duen programa elektrikoa diseinatu eta muntatu dute, eta, hala, automatizazio- eta kontrol-ezagutzak integratu dira.

Erronka horiei esker, gaitasun teknikoak modu praktikoan eta aplikatuan gara daitezke. Hala, ikasleen prestakuntza sendotzen da, etorkizunean lan-munduan sar daitezen, eta ikasgela industria-sektoreko errealitate profesionalera hurbiltzen da.